sábado 15/5/21

Ferrol demanda a modernización da liña ferroviaria

Ángel Mato remitiulles unha carta a Alberto Núñez Feijoo e a José Luis Ábalos que se acompaña do estudo realizado polo catedrático da Escola Técnica Superior de Enxeñeiros de Camiños da UDC Miguel Rodríguez Bugarín no que se cifra en 730 millóns o investimento necesario para modernizar a liña

angel-mato-alcalde-ferrol
angel-mato-alcalde-ferrol

O alcalde de Ferrol, Ángel Mato, remitiulles hoxe ao presidente da Xunta de Galicia, Alberto Núñez Feijoo, e ao ministro de Transportes, Mobilidade e Axenda Urbana, José Luis Ábalos, unha carta na que lles demanda que na súa vindeira reunión, programada para despois da Semana Santa, inclúan como tema prioritario a modernización da liña ferroviaria entre a cidade e A Coruña. O rexedor considera que é o momento axeitado para avanzar nun proxecto estratéxico para toda a comarca, que posibilite unha conexión “adaptada ao século XXI”. Tamén porque precisamente agora se está a falar “de resiliencia, de loita contra o despoboamento, de transporte sostible e de reducir as emisións de CO2”. Para Mato, a construción dun novo trazado que posibilite a redución do tempo de viaxe e faga o tren competitivo e rendible é “un piar esencial” para o desenvolvemento dos municipios da zona e para a vertebración das cidades e as comarcas polas que pasa o ferrocarril. 

 

Conxuntamente coas misivas, o alcalde remitiulles a ambos exemplares do Informe sobre a liña ferroviaria A Coruña-Ferrol, un estudo realizado polo catedrático de Enxeñaría e Infraestrutura dos Transportes Miguel Rodríguez Bugarín. Nel cífrase en 730 millóns de euros o investimento necesario para reducir á metade o tempo de viaxe entre Ferrol e A Coruña, actualmente dunha hora e quince minutos. Para o profesor da Escola Técnica Superior de Enxeñeiros de Camiños da UDC, o único xeito de abordar o problema que presenta a liña na actualidade “é modernizar o trazado”, xa que o actual non permite que os convois acaden as súas capacidades no que se refire á velocidade. 

 

“É un asunto que ten que estar na axenda política do Goberno galego e nas conversas co ministerio”, apuntou xa Mato o día da presentación do documento, a semana pasada, nunha comparecencia na que estivo acompañado da alcaldesa da Coruña, Inés Rey; do secretario xeral do Eixo Atlántico, Xoán Vázquez Mao, entidade que promoveu o estudo a petición do Concello de Ferrol, e o propio Rodríguez Bugarín, que participou de xeito telemático.  

 

“O eixo atlántico ferroviario vai de Ferrol á fronteira lusa” 

O rexedor ferrolán insistiu en que, se “verdadeiramente se quere facer unha aposta pola recuperación e a competitividade, é o momento de apostar por esta conexión ferroviaria”, e lembrou que só hai unha opción para este trazado, a de “recuperar a idea de que o eixo atlántico ferroviario vai de Ferrol á fronteira lusa”. 

 

Ademais do informe sobre o ferrocarril, a carta acompáñase do estudo Estratexias de competitividade de Ferrol e comarca, do que é autor o catedrático de Economía aplicada da UDC e expresidente da Xunta Fernando González Laxe, e que se presentou esta mesma semana no pazo municipal ferrolán. As súas conclusións inclúen medidas específicas para o sector naval, a industria, a transición enerxética, o porto exterior, as infraestruturas e a Universidade. Trátase, polo tanto, do que González Laxe denomina “un plan de relanzamento” que responde “aos desafíos que ten a cidade”. 

Comentarios