O Pleno da Corporación municipal aprobará na sesión ordinaria de novembro, que terá lugar este martes día 30 (19.30 horas), unha moción a través da cal todos os grupos (BNG, PSdeG-PSOE, Avante Poio e Partido Popular) reafirman o seu compromiso na loita contra a eliminación da violencia machista. A elaboración deste documento conxunto supón a guinda á campaña ‘Man a man contra as Violencias Machistas’, desenvolta pola Concellería de Igualdade e o Centro de Información á Muller (CIM) ao longo das últimas semanas, con motivo da conmemoración do 25N.
O texto, ademais de alertar sobre o feito de que este tipo de violencia é “o atentado máis flagrante contra a dignidade persoal, a integridade e os dereitos fundamentais das mulleres. Tamén recolle compromisos que adquire o propio Concello á hora de impulsar, dentro das súas competencias, “políticas públicas en materia de servizos sociais, sanidade, seguridade e igualdade que teñan tamén como obxectivo a abolición da prostitución”. Ademais, a institución municipal incide na importancia de “manter a loita contra a violencia de xénero como unha das máximas prioridades na axenda política local, rexeitando de maneira expresa calquera acto de violencia sobre as mulleres e fomentando a convivencia en igualdade e o respecto á diversidade”.
